Idatzi hauxe jaso dou IPARRA GALDU BAIK Plataformatik:
Iepa denoi:
Gaur vis-a-visera joan dira Ibonen ama, arreba, alaba eta bikotea. Hobe esanda, atzo joan ziren eta Navalcarneron lo egin dute gaurko vis-a 9:30etan zelako. Kartzelara heldu direnean, kartzela funtzionari batek esan die, Ibon zigortuta dagoenez vis-a-visak edukitzeko eskubidea galdu duela, eta asko jota ere 20 minutuko bisita. Abokatuari deitu eta honek adierazi die zigortuta egoteak ez diola vis-a-viseko eskubiderik kentzen. Funtzionariak berak aginduak jarraitzen dituela erantzun du. Orduan, Ibonen amak erabaki horren berri idatziz ematea eskatu die, baina funtzionariak uko egin dio eskakizun honi.
Beraz, gaixo larria pairatzeagatik etxe kartzela erregimenean zegoen pertsona bat, legea eta giza eskubideak urratuz berriz kartzelan sartu dute, hiru aldiz jipoitu dute, medikazioa kendu diote, bere etxetik 450 kilometrotara dispertsatu dute, hamar metro karratuko gela batean isolatu dute, elikagaiak eskuratzeko aukera kendu diote eta gainera bere senide eta lagunekin komunikazioak moztu dizkiote.
Ibonen aurkako bortizkeria hau, mendekuan oinarritutako espetxe politikaren ikuspegitik baino ezin da ulertu, eta sadismoan hezitako funtzionarioek baino ezin dute gauzatu. Iparra Galdu Baik plataformaren aldetik, Ibonen bizitza arriskuan dagoela behin eta berriz errepikatu dugu, baina oraingo honetan helmugara ailegatzen ari direla ikusten dugu. Hilzorian dagoen preso baten bizitzarekin jolasten ari dira, eta heriotza zigor hori erarik krudelenean gauzatu nahi dute gainera: bakardadean, isolaturik, gaixorik, etxetik urruti…
Une honetatik aurrera gertatuko denaren -Ibonen heriotzaren, alegia- arduradun nagusiak Espetxe Zuzendaritza eta bereziki Navalcarneroko kartzelako zuzendaritza dira.
Mobilizazio eta protestak antolatzera deitzen dugu hiritar oro, bakoitzak ahal duena, ahal duen lekuan, ahal duen neurrian, baina berehala. Ez daukagu astirik galtzeko.
Iparra Galdu Baik Plataforma
Turrune! 